تعالى نجرب التوبة
على جسر الحياة مرة
و نلبس زي باقي الناس وشاح أبيض
و نبقى ملايكة في الهوجة
و بنصقف لكل مداس
ما هي التوبة في حكم الأرض بتحقق أماني كتير
و بتقرب من المسافات
و بتخللي العرايا هامات
تعالى نجيب إزازة ويسكي و نقطع في ربع حشيش
و نسكن قصر م التدليس
بلاهة الحرقة و التوهة
في حكمه كلام و مكتوبة
آخرها يلفها قرطاس بطعمية
ما هي التوبة في عرف الدنيا قلابة
يا ترضى تعيش على الهامش
يا تبقى من ولاد كابش
و تركب فوق ضهور الناس
تعال نجيب أوانينا
و نبقى طابور بلاوينا
لكله نصيب من الكحكة
بشرط تجاري في الدفة
و تبقى رقيق
و لا تصرخ في عين الغولة و تحقق في كل غريب
انا و انت ولاد الأرض بندور على بطاقة في يوم ضاعت
و لا في الرول قضايانا و لا بتبان أسامينا
ملامحنا .. غناوينا .. بتتقسم على الغربان
و تفضل روحنا زنزانة و حمل تقيل على السجان
يا باقي العمر ايه حالك
في سكة ليل و باقيالك
على الأنقاض بتتجرح مع الأموات
و بنكمل بقوة دفع عطشانة لوضع ثبات
و تتمرجح خطاوينا
ما بين بكره على امبارح
و بين سطوة جناح معتوه
بقينا هياكل الساحة
و لا قادرين نقول همسة في حب الليل
و لا ماشيين في نور الشمس و نسبح مع التراتيل
و بتنا في لوحة مغدورة من السلويت
خطوط محدودة بتشاور على ذكرى
و عدنا نمصمص الشفة في قبو البيت
بنستنى نبي يطلع يداوينا
يصحي الحلم من قبره و يحيينا
نحطم قيد و تتحرر سبايانا
****
لوحة الفنان//أحمد زعبل